Бөлүмдөр
Жекшемби, 8-декабрь
Нарын облусуАк-Талаа району 30.10.2019 17:35

Жаңы-талаптыктар акимге кайсы көйгөйлөрдү санап беришти?

Turmush -  Нарын облусунун Ак-Талаа районуна жаңы дайындалган аким Сейтек Кулубаев Жаңы-Талап айылынын жергиликтүү жашоочулары менен жолугуп, көйгөйлөрдүн чечилишине көмөктөшөрүн убада кылды.

Кечээ, 29-октябрда район акими С.Кулубаев айыл өкмөттө 10 айда аткарылган иштердин жыйынтыгын угуп, айылдагы мекеме-ишканалардын иштери менен таанышуу, жергиликтүү эл менен жолугушуп көйгөйлөрүн угуу максатында Жаңы-Талап айылына иш сапары менен барган. Жолугушууларга тиешелүү райондук мекеме-ишканалардын жетекчилери катышты.

Аким алгач мекемелердин ишмердүүлүгү менен таанышты. Айылдагы социалдык жардамга муктаж, жалгыз бой карылардын үйлөрүн кыдырып, алардын абалы, жашоосунан кабар алды. Андан соң маданият үйүндө эл менен жолугушуп, айыл өкмөт башчысы Кенжебай Бейшенкулов 10 айда аткарылган иштер туурасында маалымат берди. Ал эми жарыш сөзгө чыккан жергиликтүү жашоочулар райондук электр тармактар ишканасы электр энергияны сатуудан түшкөн каражаттын 1 пайызын салык катары айылдык бюджетке которуусу жана РЭТтин айылдагы филиалы жайгашкан жер тилке үчүн салык төлөбөй жүрүшкөнүн, айылда таза суу болгону менен тийиштүү деңгээлде жетпей жатканын, көптөгөн үй-бүлөлүү жаштар турак жай курууга жер тилкелерин ала албай жатышканын, айылдын борбордук көчөсүнө асфальт төшөө зарылын, эл аралык уюм тарабынан берилген мал-жандыктардын, курут, таттуу азыктарды өндүрүү жана кийим тигүү цехинин пайдасын бир гана адам көрүп, башкаларга пайдаланууга мүмкүнчүлүк бербей жатканын, эски мектептин бир имаратын бала бакча кылуу үчүн оңдоого каражат керектигин, Сейдакматова көчөсүнө электр мамыларын орнотуу иштери 1 жылдан бери токтоп турганын билдиришип, айтылган көйгөйлөрдү чечип берүүнү район жетекчисинен суранышты.

Аким бул айтылган көйгөйлөр боюнча тиешелүү мекемелер менен бирге иш-аракеттер көрүлөрүн айтып, тапшырмалар берилерин белгиледи.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×