Бөлүмдөр
Жекшемби, 8-декабрь
Нарын облусуАк-Талаа району 10.11.2019 11:50

Ак-Талаада репрессиянын курмандыктары жана тарыхый инсандар эскерилди

Turmush -  Нарын облусунун Ак-Талаа районунда Тарых жана ата-бабаларды эскерүү күнү белгиленди. Бул тууралуу райондук администрациянын адиси Элмира Токтогулова аймактык кабарчыга билдирди.

Иш-чара 6-ноябрь күнү райондук Нуркул Кулназаров атындагы маалыматтык китепканада, Мааданбек Барашов атындагы №40 кесиптик лицейде жана тарых музейинде өткөрүлүп, ага жергиликтүү бийликтин өкүлдөрү баштаган бир катар мекеме-ишканалардын кызматкерлери катышкан. Анын жүрүшүндө Ак-Талаа жергесинен чыккан Хан Шырдакбек, Тайлак баатыр, Осмон датка, алп Тобок, Бүргө баатыр, Акмөөр, Тоголок Молдо, Муса Баетов, Жаманкара уулу Музооке, Шүкүрбек Бейшеналиев жана башка инсандар туурасында кеңири баяндама жасалды.

Ошондой эле 1937-1938-жылдары кандуу репрессияда атылган Касым Тыныстанов, Абдыкерим Сыдыков, Жусуп Абдрахманов, Нуркул Кулназаров, Мааданбек Барашов баштаган бир катар көрүнүктүү коомдук ишмерлердин эмгектери эскерилди. Мындан тышкары кыргыз тарыхындагы урунттуу учурлар туурасында дагы баяндама жасалды.

Ал эми тарых музейинин директору Мыктыбек Апиловдун баяндамасынын негизинде райондук кинодирекциясынын кызматкери Самат Саякбаев тарабынан тасма-баяндама көрсөтүлдү. Ошондой эле Нуркул Кулназаров атындагы китепкана тарабынан сүрөт жана китеп көргөзмөсү уюштурулган.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×