Turmush — Ноокат шаарын аралап аккан Чечме-Сайдын үстүнө курулган 2 объект боюнча соттук иштер 17 жылдан бери уланып келет. Бул тууралуу Ноокат шаардык мэриясы билдирди.
Маалыматка караганда, аталган жерлер суу корук аймагына кирет. Бирок 2007-жылы Ноокат шаардык мэриясынын токтому менен жеке жактарга берилип кеткен. Ал учурда шаар мэри болуп Якубжан Алимжанов иштеген.
Чечме-Сай сайынын корук аймагында жалпысынан 4 мыйзамсыз курулуш аныкталган. Алардын экөө боюнча сот чечимдери чыккан: бир объект бузулса, экинчиси боюнча доо арыз канааттандырылган эмес. Учурда дагы 2 объект боюнча соттук кароо уланууда. Алардын бири 160 чарчы метр аянтты ээлеп, түздөн-түз каналдын үстүнө курулган. Бул объект да 2007-жылдагы токтомдун негизинде берилген. Райондук прокуратура 2011-жылы аны буздуруу жана жерди мурдагы абалына келтирүү боюнча сотко кайрылган. Бирок иш ушул күнгө чейин жыйынтыктала элек.
2025-жылы Ноокат шаардык мэриясы жана шаардык кеңеш бул иш боюнча кайрадан доо арыз берип, учурда иш Ноокат райондук сотунда каралууда. Акыркы жолу 13-мартта каралып, тараптардын келбегенине байланыштуу сот отуруму 31-мартка жылдырылган.
Экинчи объект да Чечме-Сай сайынын үстүндө жайгашып, жалпы аянты 190 чарчы метрди түзөт. Ал дагы 2007-жылы мэриянын токтому менен берилген. Учурда 2 кабаттуу имарат катары пайдаланылып келет. Бул объект боюнча 2022-жылыЭкотехинспекция сотко кайрылып, курулушту буздуруу талабын койгон. Сот арызды жарым-жартылай канааттандырып, жолдун кызыл сызыгына чыгып кеткен бөлүгү гана бузулган. Калган бөлүгү сакталган. Азыркы учурда бул объект боюнча да иш Ноокат райондук сотунда каралууда. Тараптар келбегендиктен сот отуруму 31-мартка жылдырылган.
Тиешелүү мамлекеттик органдар — Санитардык-эпидемиологиялык кызмат, Өзгөчө кырдаалдар министрлиги, курулушту көзөмөлдөө органдары, райондук архитектура жана жер-суу көзөмөл инспекциялары аталган курулуштар мыйзамга каршы экенин билдиришкен.
Экинчи объект Ноокат шаарын аралап өткөн Ош–Баткен–Раззаков унаа жолунун боюнда, Чечме-Сай каналынын үстүндө жайгашкан. Анда 2 кабаттуу соода борбору иштеп жатат.
Өздүк булактардын маалыматына караганда, суу корук аймагында жайгашкан бул курулуш №4 көп мандаттуу шайлоо округунан шайланган Жогорку Кеңештин депутаттын туугандарына катталган.
Чечме-Сайдан Ноокат шаарынын жогору жагындагы сел дамбасынан ашкан сууларды шаар аркылуу агып өтөт. Акыркы жылдары сайдын туурасы тарып, жээгине жана үстүнө мыйзамсыз курулуштар салынып кеткен.
Мурда бул сай аркылуу чоң көлөмдөгү сел суулары агып турганы белгиленет.