Turmush — Кечээ, 31-март күнү Ноокен районуна караштуу Кызыл-Туу айылындагы бала бакчада суу жылыткыч жарылып, коопсуздук маселесине жакшы көңүл бурулушу керектиги белгилүү болду.
Чүй облусундагы аймактык кабарчы мындай кырсыктарды алдын алуу боюнча атайын адистерден кеӊешин укту. 17 жылдан бери сантехника тармагында эмгектенип келе жаткан Сокулук районунун 63 жаштагы тургуну Султаналы Карабашов суу жылыткычтын термодатчик деген тетиги жакшы иштеши керектигин айтты.
«Мен кеминде 1000ге чукул үйгө жер бургулап, таза суу чыгарып жана дээрлик ушунча үйдүн сантехникалык иштерин жасадым. Тажрыйбамда мындай катуу жарылган окуяны көргөн жокмун.
Бул суу жылыткычтын «термодатчиги» иштебей калган кезде, суу кайнай берип, басым чегине жеткенде жарылып кеткен болушу ыктымал. Күндүз суунун кайнап, токтобой жатканын сезип, укса болот. А кокус түндө кайнай берсе, эч ким сезбей калышы мүмкүн. Эгер «термодатчик» иштеп турса жарылмак эмес. Негизи басым өтө чоӊ болот. Анан катуу жарылат. Бирок бул видеодогу окуядагыдай жайгдайды мен буга чейин көргөн эмесмин» - деди ал.
Сантехник Үсөн Абдрахмановдун айтымында, суу жылыткычтын ичин 1 жылда бир жолу тазалап туруш керек.
«Негизи суу жылыткыч мынчалык жарылбаш керек эле. Видеодо дубалдар жарылып, ал тургай коӊшу бөлмөлөргө чейин жер титирегендей таасир калтырыптыр. Жарылса ошол суу жылыткыч турган бөлмө гана жарака кетиши керек эле.
Мындай жарылуу болбош үчүн биринчиден суу жылыткычтын «тэнин» 1 жылда бир тазалап туруш керек. «Тэнге» «нагар» толо берип, акыры бир жерин тешип чыгат. Экинчиден «обратный клапан» деп коет. Ошол иштебей калып, басым өтө күч менен кысылганда жарып чыгат. «Нагар» толгондо ток урма дагы болуп калат» - деди ал.
Суу жылыткыч сатуучу дүкөндөрдөгү адистердин кеӊеши:
1. Коопсуздук «клапанын» орнотуу керек: Бойлерде сактоочу (обратный/предохранительный) клапан болушу шарт. Ал ашыкча басымды чыгарып турат. Эгер бул клапан жок же иштебей калса — жарылуу коркунучу жогору.
2. Басымды көзөмөлдөө абзел: Суу түтүктөрүндөгү басым өтө жогору болсо, бойлерге зыян келет. Керек болсо редуктор басым (pressure regulator) орнотуңуз.
3. Температураны туура коюу керек: Өтө жогорку температура (70–90°C) коркунучтуу. Оптималдуу: 50–60°C. Бул коопсуз да, электр тогун да үнөмдөйт.
4. Ичин (Тэн жана анод) тазалоо: Ичинде «накип» (карак таш) топтолсо: «Тэн» ысып кетет. Бак ичиндеги басым жогорулайт. Жылына 1 жолу тазалатуу сунушталат.
6. Сууну толтурбай күйгүзбөңүз: Бойлерде суу жок туруп иштетсеңиз тэн күйөт жана ичиндеги басым бузулат.
7. Электр коопсуздугу: Жерге туташтыруу (заземление) болушу керек. Автомат (УЗО) орнотулган болсо жакшы. Нымдуу жерде бул абдан маанилүү.
8. Эски же шектүү бойлерди колдонбоо: Эгер бойлер тамчылап жатса, дат басса, шишип кеткендей көрүнсө, дароо өчүрүп, адиске көрсөтүңүз.
Буга чейин 31-мартта Ноокендин Кызыл-Туу айылындагы балдар бакчасында суу жылыткыч жарылганы кабарланган.
«Бүгүн эртең менен айылдагы №25 “Бакыт” балдар бакчасында жарылуу болду. Саат 6лар чамасында кароолчу келип, дарбазанын кулпусун ачып жаткан учурда катуу жарылуу угулган. Натыйжада имараттын ичиндеги дубалдар урап, бронь эшик орнотулган жеринен жулунуп чыгып кеткен. Баары кудум бомба түшкөндөй абалда болуп калды. Кийин текшергенде ашканада турган 100 литрлик суу ысытуучу аристон жарылганы белгилүү болду. Бакчанын кызматкерлери өткөн жылы аристонду тазалатып, оңдотуп иштетип келишкен экен. Бактыга жараша, ошол учурда имаратта ашпозчулар да, балдар да болгон эмес. Учурда тиешелүү кызматтар иш алып барып жатышат», - деген жергиликтүү тургун Надырбек Ташбаев.
Бул мекеме 2016-жылы капиталдык оңдоп-түздөөдөн өткөн.
Посмотреть эту публикацию в Instagram
- Андан кийин бала бакчанын ашканасындагы 80 литрлик суу жылыткыч жарылганы такталган. Каза болгондор, жаракат алгандар жок. Кырсыктын кесепетинен ашкана, 3 бөлмө кампа, кир жуучу жай, коридор, үтүктөөчү жай, (жалпы 195 метр квадрат) 11 бөлмө авариялык абалга келген.